მარტოკაცები გვანჯღრევენ და გვაღვიძებენ - ვახტანგი პაპა ჭიჩოდან; ნიკო არდოტიდან; ირაკლი ექიმი თუშეთიდან; „წიწკანა“ გომეწრის ხეობიდან; გიგლა და შიო არხოტიდან - ახიელიდან და ჭიმღიდან; იმედა ლიქოკიდან; მიხა პაპა ზეისტეჩოდან; მარუ ბებო ხახაბოდან; გოგია ბლოდან; ნაზი უკანაფშავიდან; ელო ბებო ბზიკურთკარიდან; რუსლანი თრუსოდან; მჭედელი ზემო ხურუთიდან; „ლენინა“ ჭვებარიდან; ვეფხია ზვარეთიდან; გელა ჯოისუბნიდან - მარტოკაცებისთვის თითქმის მთელი საქართველო შემოვიარეთ. ვისთანაც არ ვყოფილვართ, მალე მივალთ!

ამ საქმეში მარტო აღარ ვართ, გიორგი კეკელიძე შემოგვიერთდა, საქართველოს პარლამენტის ეროვნული ბიბლიოთეკის გენერალური დირექტორი. მისი ინიციატივით საგანმანათლებლო მოძრაობა ახალ მიმართულებას დაიწყებს -

ბიბლიოთეკა მარტოკაცებისთვის - ახალი ჟურნალები, წიგნები და ყველაფერი, რაც მარტოკაცებსა და მარტოქალებს დააინტერესებთ.

„პირველი, რაც მინდა აღვნიშნო, „მთის ამბების“ ძალიან დიდი გულშემატკივარი ვარ. ეს რაღაც თვალსაზრისით საეტაპო მოძრაობაა იმისთვის, რომ ჩვენ გაგვახსენდეს ადამიანები, რომლებიც მთლიანად მივიწყებულები იყვნენ ან უკიდურესად ფრაგმენტულად გვახსოვდა. მე ვფიქრობ, ამ გამოცემის არსებობა ჩვენთვის, საქართველოს დანარჩენი მოქალაქეებისთვის აუცილებელია.

რეალურად ჩემი საქმიანობის სფერო სწორედ სოფლებში ხშირ სიარულს, იქ ბიბლიოთეკების მოწყობას უკავშირდება. ეროვნული ბიბლიოთეკის მოძრაობა ეკვილიბრიუმი დიდწილად სწორედ ამას აკეთებს. ამაზეა დაფუძნებული ჩვენი საგანმანათლებლო ორიენტირი. ვიფიქრე, რომ ამჯერად, ერთი კონკრეტული მიმართულებით ჩვენი ძალისხმევების გაერთიანება ძალიან მნიშვნელოვანი იქნებოდა“ – „ბიბლიოთეკა მარტოკაცებისთვის“ ჩვენი რეპორტაჟების გმირებს მარტიდან ესტუმრება.

მარტოკაცებსა და მარტოქალებზე გიორგიც დაწერს, ფოტოგრაფი ნათელა გრიგალაშვილი კი გადაიღებს. წლის ბოლოს წიგნის გამოცემასაც ვფიქრობთ - მთის მარტოკაცები.

ამ თემაზე:

„მთის ამბები“ მარტოკაცების მხარდამჭერ ფონდს ქმნის