არდოტი ერთ-ერთია ფშავ-ხევსურეთისა და გუდამაყრის ხეობის 76 სოფლიდან, სადაც წელს ინტერნეტი პირველად გახდა ხელმისაწვდომი. ინტერნეტიზაციის პროექტი ფშავ-ხევსურეთის სათემო ორგანიზაციამ „მთის სათემო ქსელმა“ მცირე და საშუალო სატელეკომუნიკაციო ოპერატორების ასოციაციის, საქართველოს მთავრობის, ამერიკული ორგანიზაცია „ინტერნეტსაზოგადოების“ და საქართველოში ჩეხეთის საელჩოს მხარდაჭერით განახორციელა.

„ყველაზე მთავარი პრობლემა იყო ის, რომ არანაირი კომუნიკაცია არ გვქონდა. შატილში გვიწევდა ჩასვლა ან მუცოში მაღლა, მთაზე უნდა ავსულიყავი და იქ მეძებნა ადგილი, რომ შვილებს დავკავშირებოდი, გამეგო როგორ იყვნენ. დღეს შემიძლია ბავშვებს სახლიდან დავურეკო. ჩვენთვის ცხოვრება გაიოლდა და მთებში სიცოცხლე მართლა დაბრუნდა. თუ იქნება გზა და შუქი, არ არის გამორიცხული, რომ ზამთარშიც დარჩეს ხალხი.

ცარიელი ხევსურეთი ვის რად უნდა? უნდა რუსეთს. მხოლოდ მესაზღვრეები ვერ გადაარჩენენ და ვერ შეინახავენ ხევსურეთს. მოსახლეობა, ხალხი უნდა იყოს აქ, მთავრობა უნდა იდგეს ჩვენს გვერდით. არ მინდა, რომ ბავშვები მთას მოწყდნენ“

პირიქითა ხევსურეთში, შატილს ზემოთ მუდმივად რამდენიმე სოფელშიღა ცხოვრობენ - მუცოსა და არდოტში სამ-სამი ოჯახი, ხონეში 4. არჭილოსა და ხახაბოში ზამთარში აღარავინ რჩება. შატილში 15 ოჯახი იზამთრებს. შატილს აქეთ გუდანამდე ყველა სოფელი დაცლილია (გიორგიწმინდა, კისტანი, ლებაისკარი, ხახმატი, ბისო). შატილიდან 2 კილომეტრში, საქართველოს კუთვნილი, ე.წ. ფიჭვების ტერიტორია, იმის გამო, რომ ზამთარში იქ აღარავინ რჩებოდა, რამდენიმე წლის წინ რუსმა მესაზღვრეებმა დაიკავეს და საზღვარი გადმოწიეს. ახლა ისინი ანატორის მისადგომებთან, მდინარე არღუნის მარჯვენა სანაპიროზე დგანან.