„ეს ამბავი ბარისახოში მოხდა. ლიქოკელი ქალი იყო, ქობულოდან. დასაფლავების დღეს დიდი თოვლი მოვიდა. ქობულომდე კუბოს წაღებაც კი შეუძლებელი იყო, 4 კაცი ვერ გაივლიდა, ვერ გაკვალავდა. ხევსურული დამარხვის წესი გამოიყენეს. ადრე ხევსურეთში ხის მასალა არ იყო. დამარხვა ფარდაგით ხდებოდა. ცხედარს ფარდაგში ხვევდნენ, 2 კაცი მხარზე გაიდებდა და ისე მიჰქონდათ სასაფლაოზე“, - გვიამბობს კორშაში მცხოვრები მხატვარი შოთა არაბული.

ზამთარში, როგორც პირაქეთა, ასევე პირიქითა ხევსურეთის ბევრ სოფლამდე მისასვლელი გზები ჩაკეტილია და თოვლისგან არ იწმინდება. ზოგჯერ მიზეზი ზვავსაშიშროებაა, უფრო ხშირად კი უყურადღებობა.

ბარისახოს თემში, რომელიც პირაქეთა ხევსურეთის 35 სოფელს მოიცავს, ყველაზე ბევრი ადამიანი ბარისახოსა და კორშაშია შემორჩენილი. ოფიციალური მონაცემებით, ბარისახოში 153 ადამიანი ცხოვრობს, კორშაში 69. ლიქოკის ხეობის სოფლებში სულ 12 ადამინიღაა დარჩენილი, 4 ოჯახი; გორშეღმის ხეობის 15-მდე სოფელში 1 კაცი - მიხა არაბული; 10 სოფელი უკვე ნასოფლარია.