„ცდოს ტერიტორიაზე 110 კვ-იანი ელექტროგადამცემი ხაზის მშენებლობის ნებართვა კანონდარღვევით არის გაცემული. ხაზის მშენებლობა დაიწყო მანამდე, სანამ ნებართვის გაცემა მოხდებოდა. შემდეგ კი ნებართვა უკანა რიცხვით გაფორმდა. ჩვენ ვითხოვთ ამ ნებართვის გაუქმებას და გადამცემი ხაზისთვის ალტერნატიული მარშრუტის შერჩევას. სასამართლოში სარჩელი 1 წლის წინ შევიტანეთ. ამასობაში გადამცემი ხაზის მშენებლობა დაიწყო და დასრულდა კიდეც. როგორც აგვიხსნეს, სასამართლო გადატვირთულია და ამაზე ადრე საქმის განხილვა არ შეეძლოთ. მიუხედავად იმისა, რომ  გადამცემი ხაზის მშენებლობა დასრულებულია, ბრძოლას მაინც ვაგრძელებთ: სამართლიანი სასამართლოს პირობებში ბრძოლას აზრი ყოველთვის აქვს,“- ამბობს მოსარჩელე, ყაზბეგში მცხოვრები ზაზა წიკლაური.

ცდოს ტერიტორიაზე 110 კვ-იან გადამცემი ხაზი (220 კვ-ან გაბარიტებში) კომპანია „დარიალენერჯმა“, „საქართველოს სახელმწიფო ელექტროსისტემამ“ და შპს „ენერგოტრანსმა“ ააშენა.

სოფელი ცდო ყაზბეგის მუნიციპალიტეტში, დარიალის ხეობაში, ყაზბეგიდან 6 კილომეტრში მდებარეობს. როგორც ცდოს მოსახლეობა აცხადებს, სოფლის ტერიტორიაზე აშენებული ელექტროგადამცემი ხაზი „ზღუდავს სოფლის განვითარებას“.