„ამ სოფელში ადრე 10-მდე ოჯახი ცხოვრობდა. სოფელი დაიცალა და დღეს ერთი ოჯახიღა ცხოვრობს. მიდის ხალხი. რამდენიმე ახალგაზრდა ვფიქრობთ, რომ დავუბრუნდეთ ჩვენს სოფელს, სახლებს. რაღაც გეგმები გვაქვს, პატარა ბიზნესი გვინდა შევქმნათ, კოტეჯები გავაკეთოთ. ჩვენ რომ დაგვინახავენ, შეიძლება სხვა ახალგაზრდებმაც მოგვბაძონ და ასე გამოვაცოცხლოთ ჩვენი გუდამაყარი“.

მოსახლეობის 2014 წლის საყოველთაო აღწერის მიხედვით, გუდამაყრის ხეობის 22 სოფელში 234 ადამიანი ცხოვრობს, ზამთარში ბევრად ნაკლები. ათნოხი და ბურსაჭირი უკვე ნასოფლარებია.

შპს „სოლო ენერჯი“ გუდამაყრის ხეობაში 2 ჰიდროელექტროსადგურის მშენებლობას გეგმავდა. პროექტის მიხედვით, ორივე ჰესს კაშხალი ექნებოდა - შავ არაგვზე წყალს 9 მეტრის სიმაღლეზე დააგუბებდნენ, ბაკურხევში 7 მეტრზე. შავ არაგვს თითქმის 6 კილომეტრზე მილებში მოაქცევდნენ, ბაკურხევს 4 კილომეტრზე დაამწყვდევდნენ. გუდამაყრელები ხეობაში ასეთი ჰესების მშენებლობის წინააღმდეგები არიან.

გარემოს დაცვისა და სოფლის მეურნეობის მინისტრმა ლევან დავითაშვილმა 2019 წლის 01 მარტის ბრძანებით, შპს „სოლო ენერჯის“ უარი უთხრა გუდამაყრის ხეობაში „არაგვი ჰესი“ და „არაგვი ჰესი 1“ მშენებლობისა და ექსპლუატაციის პროექტის დამტკიცებაზე.