„ალაზანი ხეობის სავიზიტო ბარათია. მდინარის ძარღვებიდან ვიღებთ სასმელ წყალს ჭებში. ჩვენს სოფელში მოსახლეობის 95 % ჭებით სარგებლობს. ამდენ კილომეტრზე მდინარე მილებში თუ მოექცევა, ნელ-ნელა ჭებში წყალი დაშრება. არაფერი გვინდა, არც უფასო დენი, არც ტარიფების დაწევა, ჰესი არ ააშენონ“.

პანკისის ხეობაში 2 ჰიდროელექტროსადგური უკვე ფუნქციონირებს.

„ხადორჰესი“ ჩინური კომპანიის დაფინანსებით აშენდა და 2004 წელს ამოქმედდა. მდინარეები ალაზანი და სამყურა მილებში მოაქციეს. ე.წ. სადაწნეო მილსადენი კი 300 მეტრის სიმაღლიდან ეშვება.

მდინარის მცირე ნაწილი (დაახლოებით 30 %), რომელიც „ხადორჰესს“ გადაურჩა, 2013 წელს მილებში „ხადორი 2 ჰესისთვის“ მოაქციეს. „ხადორი 2“ შპს „ფერის“ საკუთრებაა.

იგივე კომპანია და მფლობელთა ჯგუფი ცდილობს პანკისის ხეობაში კიდევ ორი ჰესის მშენებლობას. ორივე პროექტზე მშენებლობის ნებართვა უკვე გაცემულია. ბირკიანში, „ხადორი 3“ ჰესის ასაშენებლად მდინარე ალაზანი დაახლოებით 4.5 კილომეტრზე მილსადენში უნდა მოაქციონ. მოსახლეობამ ჰესის სამშენებლო სამუშაოები 2018 წლის ივნისში საპროტესტო აქციებით შეაჩერა.

მეოთხე ჰესის მშენებლობა მდინარე სამყურისწყალზეა დაგეგმილი. პროექტი ითვალისწინებს 10 მეტრი სიმაღლის კაშხლიანი სათავე ნაგებობის აშენებას. ჰესის სადაწნეო მილსადენი კლდეში გაყვანილ გვირაბში უნდა მოეწყოს; დაგეგმილია კლდოვანი ქანების ბურღვა აფეთქებითი სამუშაოები, ასევე „სამყურისწყალი 2 ჰესი“-ს სააგრეგატო შენობიდან, ახმეტის ქვესადგურამდე, მაღალი ძაბვის ახალი ხაზის მშენებლობა. ერთი ასეთი ქსელი, რომელიც მაღალ ძაბვას ატარებს, პანკისის ხეობის სოფლებზე უკვე გადის.