„გუშინ ღამე დამირეკეს და მითხრეს, რომ გელამ თვითმკვლელობა სცადა. ჭრილობები დავუმუშავე და ნაკერები დავადე. გუშინ ცუდი ამინდი იყო და ამიტომ ვერტმფრენით თელავში დღეს გადაიყვანეს“, - აღნიშნა ირაკლი ხვედაგურიძემ.

თელავის რეფერალური საავადმყოფოს სამედიცინო დირექტორის, მაია მახათელაშვილის განცხადებით, პაციენტის ჯანმრთელობის მდგომარეობა ამ დროისთვის სტაბილურია.

„პაციენტს ორივე მუხლზე აქვს ზედაპირული, ხანდაზმული ტრავმა და წინამხარის ნაკვეთი ჭრილობები. გარდა ამისა, ორივე ტერფზე მოყინული აქვს პირველი თითები. ახლა მას გამოკვლევა უტარდება და ექიმი გადაწყვეტს, მოყინულ თითებზე საჭირო გახდება თუ არა ქირურგიული ჩარევა. ამ დროისთვის პაციენტის სიცოცხლეს საფრთხე არ ემუქრება“, - განუცხადა „მთის ამბებს“ მაია მახათელაშვილმა.

თუშეთის მაღალმთიან სოფლებში მცხოვრებ ორ ადამიანს რომ სამედიცინო დახმარება სჭირდებოდა, ამის შესახებ ინფორმაცია პირველად „მთის ამბებმა“ 15 თებერვალს გამოაქვეყნა. სტატიაში აღნიშნული იყო, რომ თუშეთში, სოფელ ომალოში მცხოვრები 66 წლის გელა სისაური და კვავლოში მცხოვრები 41 წლის კარლო ქუჯაიძე სტაციონარში გადაყვანას საჭიროებდნენ, სისაური კი ჰოსპიტალიზაციაზე მხოლოდ იმ შემთხვევაში იყო თანახმა, თუ მას ახმეტის ან თელავის საავადმყოფოში გადაიყვანდნენ. როგორც მაშინ კახეთის გუბერნატორის მოადგილემ, ირაკლი შიოშვილმა განაცხადა, პაციენტის ახმეტის ან თელავის ჰოსპიტალში ჩამოყვანა შეუძლებელი იყო, რადგან ვერტმფრენით ავადმყოფის გადაყვანა მხოლოდ თბილისში, ღუდუშაურის კლინიკაშია შესაძლებელი.

ჩვენ დღეს კიდევ დავუკავშირდით ირაკლი შიოშვილს და დავინტერესდით, სუიციდის მცდელობამდე ავადმყოფის ჰოსპიტალში გადმოყვანა რატომ ვერ მოხერხდა. „გელა სისაურის და კარლო ქუჯაიძის ჯანმრთელობის მდგომარეობის შესახებ ინფორმაცია ექიმმა ირაკლი ხვედაგურიძემ დაახლოებით 1,5 კვირის წინ მოგვაწოდა. სტაციონარში მათ გადმოყვანაში თავდაპირველად ხელი უამინდობამ შეგვიშალა. როცა ამინდი გამოვიდა, სისაურმა თქვა უარი ღუდუშაურის კლინიკაში გადაყვანაზე. ის ახმეტის ან თელავის საავადმყოფოში გადაყვანას ითხოვდა. ვერტმფრენს, რომელიც თბილისიდან მიფრინავს, პაციენტის გადაყვანა მხოლოდ თბილისში შეუძლია. ჩვენ 2 დღის განმავლობაში ვაწარმოებდით მასთან მოლაპარაკებას და მისი დაყოლიება ვერ მოვახერხეთ. დღეს მან თანხმობა განაცხადა ღუდუშაურის კლინიკაში გადაყვანაზე, მაგრამ ვისარგებლეთ იმ შემთხვევით, რომ შსს-ს სასაზღვრო პოლიციის ვერტმფრენი თელავში იმყოფებოდა და თელავში გადმოვიყვანეთ,” - განაცხადა „მთის ამბებთან“ საუბარში ირაკლი შიოშვილმა.

„მთის ამბები“ დაინტერესდა, რატომ არ გადმოიყვანეს თელავის საავადმყოფოში გელა სისაურთან ერთად კარლო ქუჯაიძეც. ქუჯაიძეს ხელის და ფეხის თითები აქვს მოყინული და ჩვენთან საუბარში აღნიშნა, რომ გაუსაძლისი ტკივილები ჰქონდა. შიოშვილის თქმით, ის თანახმაა თბილისში გადმოყვანაზე, მაგრამ სახლში მარტოა და საქონელს ვერ ტოვებს. ვერტმფრენით მორიგი რეისი თუშეთის მიმართულებით 21 თებერვალს შესრულდება. რეისს თუშეთში ქუჯაიძის ახლობელიც გაჰყვება, რომელიც მის სახლში დარჩება და საქონელსაც მიხედავს, დაშავებულს კი სამკურნალოდ ღუდუშაურის კლინიკაში გადაიყვანენ.