სოფელი ჟაშქვა ონიდან 9 კილომეტრითაა დაშორებული. მდებარეობს რაჭის ქედის ჩრდილოეთ კალთაზე, პიპილეთის თემში, ზღვის დონიდან 1220 მეტრზე.

წელს ონში მიწისძვრა უკვე მესამედ მოხდა. სეისმური მონიტორინგის ეროვნული ცენტრის ინფორმაციით, 3.7 მაგნიტუდის სიმძლავრის მიწისძვრა ქალაქ ონში 7 აპრილს, 21:37 საათზე დაფიქსირდა. სოფელ ქვედთან ახლოს 3.5 მაგნიტუდის სიმძლავრის მიწისძვრა 2 აპრილსაც მოხდა.

რაჭა მაღალი სეისმურობით გამოირჩევა. 1991 წლის 29 აპრილს, 09:12 საათზე მომხდარი მიწისძვრის სიმძლავრე 6.9 მაგნიტუდა იყო, ეპიცენტრში კი ინტენსივობა 9 ბალს აღწევდა. მიწისძვრის ეპიცენტრი რაჭისა და იმერეთის მაღალმთიან სოფლებში მდებარეობდა. მიწისძვრას მსხვერპლი მოჰყვა. 2009 წლის 8 სექტემბერს ონის რაიონში კიდევ ერთი ძლიერი მიწისძვრა მოხდა, რომლის სიმძლავრეც 6.2 მაგნიტუდა იყო.

მაღალი სეისმურობის მიუხედავად, ონში ჰესების კასკადის მშენებლობა და გვირაბების გაყვანა იგეგმება ბურღვა აფეთქების მეთოდით.