რუსული კარტოფილის საბითუმო ფასი 70 თეთრია და 10-20 თეთრით აღემატება ქართული პროდუქციის ღირებულებას.

გასულ წელს საქართველოში 23 ათასი ტონა კარტოფილი შემოვიდა. ყველაზე მეტი, თითქმის 17 ათასი ტონა, რუსეთიდან და ბელარუსიდან შემოიტანეს.

საქსტატის მონაცემებით, საქართველოში 199 ათასი ტონა კარტოფილი მოდის, სასურსათო მოხმარებისთვის კი 192 ათასი ტონა გვჭირდება. რეგიონების მიხედვით ყველაზე მეტ კარტოფილს - თითქმის 130 ათას ტონას, სამცხე-ჯავახეთში აწარმოებენ.

რუსეთიდან და ბელარუსიდან იმპორტის ზრდის გამო, ადგილობრივ ფერმერებს კარტოფილის რეალიზაცია ბოლო 2 წელია განსაკუთრებით უჭირთ, რამაც რეგიონში ნათესი ფართობები უკვე შეამცირა.

მეკარტოფილეობა ჯავახეთში შემოსავლის ერთ-ერთი მთავარი წყაროა. ახლა რეგიონს უფრო მეტი ახალგაზრდა ტოვებს. მათი უმრავლესობა ოჯახების სარჩენად რუსეთში მიდის, რითაც საქართველოს კიდევ უფრო მეტი მოქალაქე ხდება ოკუპანტ ქვეყანაზე დამოკიდებული.

ამავე თემაზე ნახეთ ქართული წარმოების რუსული საფრთხე

„რაც გადარჩა, მაქსიმუმ 2-3 კვირა გაძლოს და შემდეგ გადასაყრელი იქნება. ამ ფონზე, როცა ჩვენთან ასე ფუჭდება მოსავალი, რუსეთიდან შეუჩერებლად შემოდის. 40 ტონა ხახვი მილპება. საქმეს აკეთებ, დოვლათს ქმნი, მუშახელს ასაქმებ. ბევრს ხომ არ ვითხოვთ?! ჩვენს ქვეყანაში მოგვეცეს საშუალება, რომ მოყვანილი მოსავალი გავყიდოთ. 65-70 თეთრი ღირდეს ქართული ხახვი, განა ბევრია?“ – ამბობს ვასიკო ბაქრაძე, ფერმერი ქარელიდან.

2023 წლის იანვარ-ნოემბერში რუსეთიდან საქართველოში 14 ათასამდე ტონა ხახვის იმპორტი განხორციელდა. რუსეთი იმპორტიორ ქვეყნებს შორის პირველ ადგილზეა. 

იგივე პერიოდში რუსეთიდან საქართველოში შემოვიდა 45 მილიონი დოლარის ღირებულების ხორბალი, ქართველი ფერმერებს კი ხორბალი უფუჭდებათ.