წარმოშობით იტალიელი ვიტორიო სელა ფოტოგრაფიით - მამამ, ალპინიზმით კი ბიძამ დააინტერესა. სვანეთამდე, სელამ არაერთ ექსპედიციაში მიიღო მონაწილეობა, მათ შორის მშობლიურ ალპებში, აფრიკასა და აზიაში, ასევე - ალიასკაში.

კავკასიის ექსპედიციების დროს (1889, 1890, 1896 წწ.) სელას მიერ გადაღებული ფოტომასალის დიდი ნაწილი სვანეთთან არის დაკავშირებული. ნამუშევრებზე აღბეჭდილია სვანური სოფლები, პეიზაჟები, ეთნოგრაფია, ოჯახები, ყოფა და პორტრეტები.

ვიტორიო სელას მიერ სვანეთსა და რაჭაში გადაღებული ფოტოების ნაწილის მოძიება და საქართველოში ჩამოტანა, 1980-იან წლებში, ქართველმა მწერალმა და რეჟისორმა რეზო თაბუკაშვილმა შეძლო. ნამუშევრები დღეს საქართველოს ეროვნულ არქივში ინახება.

იტალიელი ფოტოგრაფი და ალპინისტი - ვიტორიო სელა 1943 წელს, 12 აგვისტოს გარდაიცვალა.