საღამოს, ტრაქტორები მდინარეში გზის აღდგენას მიწაყრილებით ცდილობდნენ, მაგრამ ვერ მოახერხეს.

წაღებული გზის ორივე მხარეს ათზე მეტი მანქანა იყო გაჩერებული. მგზავრები გზის გახსნას ელოდნენ. რამდენიმე მათგანი გაწყვეტილი გზის მეორე მხარეს შემოვლითი, სახიფათო ბილიკით გადავიდა.

„ათამდე მანქანა უკან მიბრუნდა. იმ ადგილას, სადაც სტიქიაა, არც სატელეფონო კავშირია. ხვალ თუ ვინმე აპირებს აქეთ წამოსვლას, თავი შეიკავოს, სანამ გზას არ აღადგენენ. გვითხრეს, რომ ახალი ტრაქტორი მოდის ბარისახოდან, მაგრამ ნელა მოძრაობს და დილამდე ვერ ჩამოვიდოდა. თავი ვერ მოება, პირიქითა ხევსურეთში ორი ერთეული მძიმე ტექნიკა რომ დააყენონ, ადგილზე სწრაფი რეაგირებისთვის. სულ ეს პრობლემაა. რა მთის განვითარებაზეა საუბარი“, - ამბობს გაგა შეთეკაური, რომელიც დღეს ბარიდან ხევსურეთის სოფელ ხონეში მიემგზავრებოდა.

ადგილობრივების თქმით, პირიქითა ხევსურეთში გუშინ კოკისპირული წვიმა იყო, რამაც მთაზე თოვლი დაადნო და მდინარე აადიდა.

წყალმა დაფარა შატილში, კოშკებთან, მდინარეზე გადასასვლელი საფეხმავლო ხიდიც. შატილში მცხოვრები გიორგი ჭინჭარაულის თქმით, მდინარეში წყლის დონემ თუ არ დაიწია, საფეხმავლო ხიდი შესაძლოა მოგლიჯოს და წაიღოს.