11 აგვისტოს მონაცემებით, საქართველოში კორონავირუსის 14 ახალი შემთხვევა გამოვლინდა.

მათ შორის, Covid-19 შინაგან საქმეთა სამინისტროს 11 თანამშრომელს დაუდასტურდა. 7 შემთხვევა საპატრულო პოლიციის დეპარტამენტის საზღვრის მართვისა და კოორდინირების მთავარი სამმართველოს თანამშრომლებში დაფიქსირდა. შვიდივე პოლიციელი სამსახურებრივ მოვალეობას დარიალის სასაზღვრო-გამტარ პუნქტზე ასრულებდა. ყველა მათგანი გადაყვანილია თბილისის ინფექციურ საავადმყოფოში. 3 შემთხვევა - მესტიის მუნიციპალიტეტში გამოვლინდა. ინფიცირებულები არიან მეხანძრე-მაშველი, დაცვის პოლიციელი და სასაზღვრო პოლიციის თანამშრომელი. Covid-19 დაუდასტურდა თბილისში, დაცვის პოლიციის ინსპექტორსაც.

შინაგან საქმეთა სამინისტროს ინფორმაციით, ინფიცირებულ პირებთან შემხებლობაში მყოფი 20-ზე მეტი თანამშრომელი საკარანტინო სივრცეშია გადაყვანილი.

წინასწარი ინფორმაციით, სასაზღვრო პოლიციის თანამშრომლებს კორონავირუსი სატვირთო ავტომობილების მძღოლებისგან გადაედოთ.

ჩაიკეტება თუ არა ყაზბეგი, დამოკიდებულია იმაზე, ეპიდემიოლოგების მიერ კვლევის შედეგად, მუნიციპალიტეტში როგორი სიტუაცია იქნება.

შეგახსენებთ, 10 აგვისტოს, მესტიის მუნიციპალიტეტში, COVID-19-ით ინფიცირების 16 შემთხვევის დადასტურების გამო, ზემო სვანეთი ჩაიკეტა. გადაადგილება შეიზღუდა როგორც მესტიის მუნიციპალიტეტის მიმართულებით, ასევე, მესტიის მუნიციპალიტეტიდან. აიკრძალა სოფლებს შორის მიმოსვლაც. მუნიციპალიტეტში შესვლა შეუძლია მხოლოდ ადგილობრივ მცხოვრებს, გამოსვლის შემთხვევაში კი მოქალაქეები ორკვირიან სავალდებულო კარანტინს გაივლიან. 11 აგვისტოს, მესტიის მუნიციპალიტეტში მყოფი 518 მოქალაქე საკარანტინო ზონებში გადაიყვანეს. დაბა მესტიაში, ლენჯერსა და უშგულში ფუნქციონირების უფლება მხოლოდ აფთიაქებს, საბანკო დაწესებულებებს, სასურსათო მაღაზიებსა და ღია ტიპის საკვებ დაწესებულებებს აქვთ.

ჯანდაცვის მინისტრის, ეკატერინე ტიკარაძის განცხადებით, საერთაშორისო პრაქტიკის მიხედვით, საკარანტინო პერიოდი 28 დღეა.

ამ დროისთვის საქართველოში კორონავირუსის 1 264 შემთხვევაა დადასტურებული. მათ შორის გამოჯანმრთელებულია 1054, გარდაიცვალა 17 პაციენტი. კარანტინის რეჟიმშია - 7279 პირი, სტაციონარში მეთვალყურეობის ქვეშ - 279. უცხოეთიდან სამკურნალოდ გადმოყვანილია საქართველოს 41 მოქალაქე.

ამ თემაზე:

ყაზბეგის ჩაკეტვის რისკი არ არსებობს, მესტიაში კორონავირუსის შემთხვევები გაიზარდა