9222 
სოფელ შუაფხოს მცხოვრებლების თქმით, ორწყლიდან შუაფხომდე თოვლისგან ჩაკეტილი გზა რომ გაეხსნათ, ტრაქტორისთვის საწვავი ნისიად აიღეს, რადგან დუშეთის მუნიციპალიტეტის მერიამ ტექნიკა საწვავით ამ დრომდე ვერ მოამარაგა.
შუაფხოს იქით სოფლებამდე მისვლა შეუძლებელია. გზაზე თოვლის სიმაღლე 60 სანტიმეტრს აღწევს. უკანაფშავსა და ელიაგზაში მცხოვრები 2 ადამიანი, რომლებიც გუშინ დუშეთში იმყოფებოდნენ დოკუმენტების მოსაწესრიგებლად, სახლებში ვეღარ ბრუნდებიან.
ბარისახოში დუშეთის მერის წარმომადგენლის მზექალა არაბულის განცხადებით, საავტომობილო გზაზე მოძრაობა კორშას ჩათვლით არის შესაძლებელი. კორშას ზემოთ მდებარე სოფელი გუდანი, სადაც 4 ოჯახი ცხოვრობს, ლიქოკის ხეობის სოფლები, ასევე დათვისი და გველეთი გარესამყაროს არის მოწყვეტილი.
სოფლებთან დამაკავშირებელი გზების გაწმენდა არც ბარისახოს თემში მიმდინარეობს.
