არაფერს ვაკლებ, რაც შემიძლია... მე ვიცი ყველაფერი რა უნდა და ვუკეთებ, მეტი რა ვქნა.

ვიდრე პირში სული მიდგას, მივხედავ. რაც არ უნდა იყოს, ყველაფერი უნდა მიატოვო და ბავშვს მოუარო...“

ელენე კვანჭიანი შვილთან ერთად, ზემო სვანეთში, სოფელ ვედში (ხაიშის თემი), საქონლის სადგომში ცხოვრობს. ძველი სახლი 10 წლის წინ დაენგრათ. დედა-შვილი უმძიმეს პირობებშია - გომურში წყალი ჩადის, დიდთოვლობის ან ძლიერი ქარის დროს, შესაძლოა, დაინგრეს.

ელენე და სოსლანი, ვედში, ზემო სვანეთის სათემო ორგანიზაციის წევრებთან ერთად, რამდენიმე დღის წინ მოვინახულეთ. „მთის ამბების“ საქმიანობაში ეს პირველი შემთხვევა იყო, ცოტა მაინც რომ გვენუგეშებინა, იქვე გავუმხილეთ - ვეცდებოდით, რომ დედა-შვილის ურთულესი პირობები შეგვემსუბუქებინა. პირველ რიგში კი თქვენი იმედი გვაქვს, მაყურებლების მხარდაჭერის, ისე, როგორც ეს მიხა პაპას, ბლოელი გოგიას და საბედა ბებოს შემთხვევაში მოხდა.