2002-2005 წლებში მუშაობდა სატელევიზიო სარეკლამო სტუდია „არტ მედიას“ მენეჯერად; 2000-2002 წლებში მსოფლიო ბანკის პროექტში – საქართველოში მიმდინარე ეკონომიკური რეფორმების საინფორმაციო ცენტრის ჟურნალისტად. პროფესიით ჟურნალისტია.

1994-1996 წლებში სწავლობდა ინდიანაპოლისის შტატის საერთაშორისო უნივერსიტეტში, ჟურნალისტიკის ფაკულტეტზე. 1994-1999 წლებში ივანე ჯავახიშვილის სახელობის თბილისის სახელმწიფო უნივერსიტეტში ამავე მიმართულებით.

ლევან ზაუტაშვილმა გუბერნატორის თანამდებობაზე გოჩა ზეიკიძე შეცვალა, რომელიც 2014 წლის თებერვლიდან ჯერ მცხეთა–მთიანეთის გუბერნატორის მოადგილედ, ხოლო 2016 წლის მარტიდან გუბერნატორად მუშაობდა.

ზეიკიძე თანამდებობიდან რამდენიმე დღის წინ გაათავისუფლეს. სოციალურ ქსელში გამოქვეყნებულ განცხადებაში ზეიკიძე გათავისუფლების მიზეზებზე არ საუბრობს, თუმცა „რეგინფოს“ ინფორმაციით, ეს საკადრო ცვლილება საქართველოს პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველ მოადგილესთან, ერეკლე ტრიპოლსკისთან დაპირისპირებას უკავშირდება.

საქმე ეხება დუშეთის მუნიციპალიტეტის გამგებლის გიზო ჩოხელის საქმიანობას. დუშეთის გამგებელი აუდიტის სამსახურმაც არაერთხელ ამხილა დარღვევებში, რომლებიც დანაშაულის ნიშნებს შეიცავს.

დაზუსტებული ინფორმაციით, დარღვევებთან დაკავშირებით, ცოტა ხნის წინ, გოჩა ზეიკიძემ წერილით პრემიერ–მინისტრ გიორგი კვირიკაშვილს მიმართა და გამგებლის გათავისუფლება მოითხოვა, რამაც ერეკლე ტრიპოლსკის გაღიზიანება გამოიწვია. დუშეთის მუნიციპალიტეტის გამგებელს ტრიპოლსკი ლობირებს.