პროექტის ფარგლებში კონკურსი გამოცხადდა 28 იანვარს და განაცხადების მიღება შესაძლებელი იყო 28 თებერვლის ჩათვლით. კონკურსის შედეგად მივიღეთ 287 განაცხადი, თუმცა, მარტში, როცა პასუხის გასაგებად არაერთი ახალგაზრდა დაგვიკავშირდა, აღმოჩნდა, რომ ბევრი მათგანის ანკეტა, რომლებიც შევსებულია 28 იანვრიდან 11 თებერვლამდე პერიოდში, საერთოდ არ გვაქვს მიღებული, სავარაუდოდ, ტექნიკური პრობლემის გამო, რაზედაც ვწუხვართ.

იმ მიზნით, რომ დაინტერესებულ პირებს კვლავ მივცეთ პროექტში მონაწილეობის მიღების შესაძლებლობა, კონკურსს ვაცხადებთ განმეორებით.

ვისთვის არის სასწავლო კურსი განკუთვნილი

სასწავლო კურსის მსმენელებად მიიღებიან ახალგაზრდები 18-დან 35 წლამდე. პრიორიტეტი მიენიჭებათ საქართველოს რეგიონებში, განსაკუთრებით მთაში მცხოვრებ ახალგაზრდებს, რომლებიც:

• წერენ გამართულად და საინტერესოდ;
• უყვართ ხეტიალი;
• შეუძლიათ ფოტო/ვიდეო გადაღება;

სასწავლო კურსის ფორმატი

მონაწილეთა სწავლების, ტრანსპორტირების, საოჯახო სასტუმროში ცხოვრებისა და კვების ხარჯებს ორგანიზატორი დაფარავს.

სასწავლო კურსის ხანგრძლივობა 6 დღეა. შერჩეული ახალგაზრდები პროგრამის ფარგლებში შეისწავლიან: ინფორმაციის წყაროებთან მუშაობას; ახალი ამბებისა და გრძელვადიანი თემების მოძიებას; საკითხების შერჩევას; ახალი ამბების მომზადებას; თხრობის ტექნიკას; ფოტო - ვიდეო გადაღებას; მონტაჟს. სასწავლო კურსს გაუძღვებიან მოწვეული სპეციალისტები.

სასწავლო კურსის დასრულების შემდეგ

კურსის ბოლოს პროგრამის მონაწილეებს გადაეცემათ „დოიჩე ველე აკადემიის“ სერტიფიკატები. სასწავლო კურსის დასრულების შემდეგ მონაწილეებმა „მთის ამბებისთვის“ უნდა მოამზადონ მულტიმედია მასალები, რაშიც მიიღებენ ჰონორარს. „მთის ამბები“ განიხილავს წარმატებული კურსდამთავრებულების დასაქმების შესაძლებლობას.

როგორ მივიღოთ კონკურსში მონაწილეობა

დაინტერესებულმა პირებმა რეზიუმე და მოკლე სამოტივაციო წერილი (არაუმეტეს 150 სიტყვა) უნდა გამოგზავნონ 2019 წლის 25 მარტის ჩათვლით ელექტრონული ფოსტის შემდეგ მისამართზე: ელ-ფოსტის ეს მისამართი დაცულია სპამ-ბოტებისგან. ნახვისთვის უნდა გქონდეთ ჩართული JavaScript.

ყურადღება მიაქციეთ სამოტივაციო ნაწილს, სადაც უნდა ახსნათ, რატომ გსურთ პროგრამაში მონაწილეობა, რა მოლოდინი გაქვთ და როგორ გამოიყენებთ მიღებულ გამოცდილებას მაღალმთიანი რეგიონებისთვის. მონაწილეთა შერჩევისას მოტივაციას განსაკუთრებული მნიშვნელობა ენიჭება და მის გარეშე განაცხადი არ განიხილება.

შერჩეულ კანდიდატებთან გასაუბრება ჩატარდება მარტის ბოლოს, თბილისსა და ზუგდიდში, რის შემდეგაც შეირჩევა პროგრამის 15 ფინალისტი.

Mtisambebi.ge საქართველოში მაღალმთიან რეგიონებზე ფოკუსირებული ერთადერთი მედია რესურსია. პროექტის მიზანია ისეთი დასახლებებიდან, როგორიცაა თუშეთი, ხევსურეთი, ფშავი, მთიულეთი, ხევი, თრიალეთი, სამცხე – ჯავახეთი, მთიანი აჭარა, რაჭა – ლეჩხუმი და სვანეთი ახალი ამბების მომზადება და გავრცელება. გამოცემა განსაკუთრებულ ყურადღებას უთმობს მთიან რეგიონებში არსებული პრობლემების გადაწყვეტის ხელშეწყობას.

პროექტს მართავს საინფორმაციო ცენტრების ქსელი (ICN), რომელიც ასევე აერთიანებს რეგიონული ახალი ამბების სააგენტო „რეგინფოს“ (Reginfo.ge),  თბილისში მდებარე მულტიმედია სტუდიას, კახეთის საინფორმაციო ცენტრს (ick.ge)  და პანკისის სათემო რადიოს (Radioway.ge).