ძლიერი წვიმის შედეგად ხევსურეთში მდინარე არღუნი და მისი შენაკადები ადიდებულია. ტურისტების ინფორმაციით, ისინი გადაადგილებას ვეღარ ახერხებდნენ და უსაფრთხო ადგილზე გაყვანას ითხოვდნენ. შეტყობინების გამოგზავნის შემდეგ მათთან კონტაქტი გაწყვეტილია. გუროს ხეობაში და მიმდებარე ტერიტორიაზე სატელეფონო კავშირი არ არის.

ადგილობრივებმა ამერიკელი ტურისტები ვერც შატილში და ვერც ხევსურეთის სხვა დასახლებულ სოფლებში ვერ იპოვეს.

როგორც „მთის ამბებს“ საგანგებო სიტუაციების მართვის სააგენტოში განუცხადეს, სამძებრო სამუშაოები შეტყობინების მიღებისთანავე დაიწყო, თუმცა სტიქიის გამო როგორც პირაქეთა, ასევე პირიქითა ხევსურეთში საავტომობილო მიმოსვლა შეწყვეტილია.

სოფლებთან ბისოსთან და ხახმატთან მეწყერია ჩამოსული, გზა ჩაკეტილია, დაგლეჯილია ელექტროენერგიის საყრდენი ბოძები.

„დაზუსტებული გვაქვს კოორდინატები, საიდანაც დაკავშირება მოახერხეს. იქ ტელეფონი არ იჭერს და ტურისტებისგან sos შეტყობინება გვაქვს მიღებული. მათთან კონტაქტი ვეღარ ხერხდება, თუმცა დუშეთიდან მაშველები წასულები არიან, სადაც გზა არ არის, ფეხით გადაადგილდებიან და ცდილობენ მათი ადგილსამყოფელის დადგენას და დახმარებას“, – განაცხადეს საგანგებო სიტუაციების მართვის სააგენტოში.

შატილიდან „მთის ამბების“ მოქალაქე რეპორტიორი იტყობინება, რომ გუროს ხევთან ადიდებულმა არღუნმა გზა სამ ადგილზე მთლიანად წაიღო. საავტომობილო გზა სხვა მონაკვეთებზეც არის დაზიანებული.

ხევსურეთში გუშინ დილიდან გადაუღებლად წვიმს. უამინდობის გამო სამძებრო–სამაშველო სამუშაოებში ჩართვას ვერც ვერტმფრენი ახერხებს. უღელტეხილზე ნისლის გამო ფრენა აკრძალულია.

გარემოს ეროვნული სააგენტოს ინფორმაციით, 7 ივლისს საქართველოში გრილი და წვიმიანი ამინდი შენარჩუნდება. ცალკეულ რაიონში შესაძლებელია ძლიერი წვიმა. 8 ივლისს დილიდან გამოიდარებს, იწვიმებს მხოლოდ ზოგიერთ რაიონში. ძლიერი წვიმის გამო, მდინარეებზე ნარჩუნდება წყალმოვარდნების საშიშროება. შესაძლებელია მეწყრულ-ღვარცოფული პროცესების განვითარება. 9 ივლისს მოსალოდნელია დროგამოშვებით ხანმოკლე წვიმა და ელჭექი, აღმოსავლეთ საქართველოში ზოგან შესაძლებელია სეტყვა. 10 ივლისს დღისით საქართველოს ტერიტორიის უმეტეს ნაწილზე გამოიდარებს.