3987 
საქმე ეხება ელიზბარ კობახიძის სტატუსს, რომელიც მან თბილისში მიმდინარე პროევროპულ აქციებთან დაკავშირებით სოციალურ ქსელში გამოაქვეყნა: „მოდის დრო 1200000 კაცმა დავიცვათ ჩვენი სამშობლო. ანგრევენ ქვეყანას“.
ეთერ არსანიძემ აღნიშნული სტატუსის სქრინი ჯგუფ „რაჭველებში“ განათავსა, სადაც სოციალური ქსელის მომხმარებლები კობახიძეს მოუწოდებენ, წერა-კითხვა ისწავლოს. ჯგუფის წევრების ნაწილმა თანამდებობის პირის ეს სტატუსი დაპირისპირებისკენ მოწოდებად აღიქვა.
„ჯერ ჩემს ახლო მეგობარს დახვდა და ითხოვდა, წამეშალა ეს სქრინი. დღეს ჩემს ძმას აედევნა, გააჩერა და გააფრთხილა, „გააჩერე შენი და“, „წაშალოს ის პოსტი, თორემ ნახავთ, რა შემიძლია“.
საქართველოს სისხლის სამართლის კოდექსის თანახმად, დანაშაულს წარმოადგენს რასობრივი, რელიგიური, ეროვნული, კუთხური, ეთნიკური, სოციალური, პოლიტიკური, ენობრივი ან/და სხვა ნიშნის მქონე პირთა ჯგუფებს შორის განხეთქილების ჩამოსაგდებად ძალადობრივი ქმედებისაკენ ზეპირად, წერილობით ან გამოხატვის სხვა საშუალებით საჯაროდ მოწოდება.
სისხლის სამართლის დანაშაულია ასევე სიცოცხლის მოსპობის ან ჯანმრთელობის დაზიანების ანდა ქონების განადგურების მუქარა.
ელიზბარ კობახიძე რაჭა-ლეჩხუმ-სვანეთის მრავალგზის მაჟორიტარი დეპუტატის, ამჯერად არალეგიტიმური პარლამენტის წევრის, გოჩა ენუქიძის ნდობით აღჭურვილი პირია. „ქართულმა ოცნებამ“ კობახიძე 2024 წლის 26 ოქტომბრის საპარლამენტო არჩევნებისთვის პარტიულ სიაშიც შეიყვანა 136-ე ნომრად.
ის პირადად „იცავდა“ ენუქიძის სასტუმროსა და კარ-მიდამოს, როცა „მთის ამბების“ ჯგუფი (მათ შორის, ეთერ არსანიძე) იქ რეპორტაჟის მოსამზადებლად ჩავიდა. ამბროლაურის მერიამ 300 ათასამდე ლარი დახარჯა გოჩა ენუქიძის კუთვნილი ერთი სასტუმროდან მეორე, ახალაშენებულ სასტუმრო კოტეჯებამდე დამაკავშირებელი გზის რეაბილიტაციისთვის. ვენახებს შორის არსებული ვიწრო გზის გასწვრივ არავინ ცხოვრობს. ამ მონაკვეთს, ოფიციალურად ადგილობრივი მნიშვნელობის გზის სტატუსიც კი არ აქვს.
ელიზბარ კობახიძე შოვის ტრაგედიის დროს, „მთის ამბების“ რედაქტორს წყალში გადაგდებით დაემუქრა მხოლოდ იმის გამო, რომ ის სტიქიას აშუქებდა. მისი მეგობარი და იმავე დროს პარლამენტის წევრის, გოჩა ენუქიძის ბიუროს უფროსი გიორგი მახათაძე კი, შოვში, სადაც სტიქიური უბედურების შედეგად დაღუპულებს ეძებდნენ, ბახილებით იყო მისული, ფეხსაცმელი რომ არ დასვროდა.
