ფილმი რაჭაში, კურორტ შოვში 3 აგვისტოს მომხდარ სტიქიურ უბედურებას ეხება, რომელსაც 33 ადამიანი ემსხვერპლა. ჟურნალისტური გამოძიებით დადასტურდა, რომ სტიქია შოვში ათწლეულების განმავლობაში მოსალოდნელი იყო. მიუხედავად ამისა, საკურორტო ზონაში ერთი საევაკუაციო გეგმა, დაფა, ფირნიშიც კი არ არსებობდა. ხელისუფლების დანაშაულებრივი გულგრილობის გამო სრულად არ აშენდა ჯებირი მდინარე ბუბაზე, რომელმაც გადაარჩინა სასტუმრო „სანსეტის“ დამსვენებლები და ურომლისოდაც დაიღუპა მამისონის კოტეჯების ყველა ბინადარი. სტიქიის შემდეგ სამაშველო ოპერაცია არაკოორდინირებული იყო. არ არსებობდა პროტოკოლი, მაშველებს არ ჰქონდათ საჭირო აღჭურვილობა, დაიკარგა ყველაზე ძვირფასი პირველი საათები. ადამიანები სიკვდილთან პირისპირ დარჩნენ. სამაშველო ოპერაცია რამდენიმე საათის დაგვიანებით დაიწყო, 3 აგვისტოს შებინდებისთანავე კი შეწყდა. მთელი ღამის განმავლობაში არ უფრენია ვერტმფრენს, არ უმუშავია მაშველს, არ გამოუყენებიათ დრონები. თავისი უმწეობისა და უუნარობის დამადასტურებელი მტკიცებულებების დაფარვა ხელისუფლებამ გათენებისთანავე დაიწყო.

არ ჩატარდა სათანადო საგამოძიებო მოქმედებები, ცხედრები პროზექტურაში სავალდებულო პროცედურების გარეშე გადაასვენეს, რამაც სიკვდილის ზუსტი მიზეზისა და დროის დადგენა შეუძლებელი გახადა.

ხელისუფლების მაღალი თანამდებობის პირები მატყუარებს უწოდებდნენ განსაცდელში მიტოვებულ ადამიანებს, თვითონ კი საპარლამენტო ტრიბუნიდან არ ერიდებოდნენ ტყუილებს, როგორიც არის - 3 აგვისტოს უამინდობა მთელ საქართველოში; წინასწარი შეტყობინების სისტემების არაეფექტურობა სხვა ქვეყნებში.

მთელი სახელმწიფო მანქანა მწყობრად მუშაობდა სამძებრო ოპერაციის დღეებში, რათა ტრაგედიის ადგილიდან მათთვის არასასურველ ინფორმაციას არ გამოეჟონა; ახლა კი მწყობრად მუშაობს იმისთვის, რომ კრიტიკული მედიისა და დამოუკიდებელი მეცნიერებისთვის, ყველა საჯარო უწყება დახურული იყოს, საჯარო ინფორმაცია - ხელმიუწვდომელი.

ჟურნალისტური გამოძიების ნომინაციაში ჟიურის წევრები იყვნენ: სოფო მეგრელიძე - Associated Press-ის კავკასიის ბიუროს პროდიუსერი; ზვიად ქორიძე - ჟურნალისტი, მედიაექსპერტი; რუსუდან ცხომელიძე - USAID-ის მედია პროგრამის მრჩეველი მედიის საკითხებში; მაია წიკლაური - საქართველოს ჟურნალისტური ეთიკის ქარტიის საბჭოს წევრი.

სხვა კატეგორიებში ქარტიის პრიზის გამარჯვებულები გახდნენ:

• ეკა ქევანიშვილი რადიო „თავისუფლებიდან“ ქალთა უფლებებისა და გენდერული თანასწორობის საუკეთესო გაშუქებისთვის - ქალთა თავშესაფარში მოსმენილი ამბები;
• სოფო აფრიამაშვილი „ნეტგაზეთიდან“ ადგილობრივი პრობლემების საუკეთესო გაშუქებისთვის - პანკისელების ბრძოლა მოქალაქეობისთვის;
• მარიამ მუმლაძე Chai Khana-დან - ფოტო/ფოტორეპორტაჟი ონლაინ ან ბეჭდურ მედიაში - ქართველები უკრაინული დროშის მიღმა;
• ლანა კოკაია რადიო „თავისუფლებიდან“ საუკეთესო სტატია ონლაინ მედიაში - როგორ ვიმუშავე ქსელურ მარკეტში და რა გავიგე დასაქმებულთა უფლებებზე;
• ბუთა ორჯონიკიძე „ნეტგაზეთიდან“ ბლოგი ონლაინ მედიაში - უცხო ქუჩა, რომელზეც ვცხოვრობ;
• თენგიზ გოგოტიშვილი „მთავარი არხიდან“ ხალხის რჩეული მასალა ევროინტეგრაციის თემაზე - ცხოვრება ევროპულად: სკოლა | რა სარგებლობა მოაქვს EU-ს წევრობას.

გამარჯვებული ავტორები სასწავლო ვიზიტით და გამოცდილების გასაზიარებლად ჩეხეთის დედაქალაქ პრაღაში გაემგზავრებიან. ქარტიის პრიზი USAID/Georgia-ს მედია პროგრამის მიერ გაიცა. პროგრამა ხელს უწყობს მაღალი ხარისხის, ეთიკურ სტანდარტებზე დაფუძნებული ჟურნალისტიკის განვითარებას.

დღესვე მთის ამბები/საქართველოს ამბების რედაქტორი გელა მთივლიშვილი ჟურნალისტთა ეთიკის ქარტიის საბჭოს წევრად მესამედ აირჩიეს სამი წლის ვადით.