წუხელ, ღამით ახალგაზრდები ირიდან ონში მიდიოდნენ, რა დროსაც ავტომობილით ხევში გადავარდნენ. მომხდარის შესახებ 112-ს ნიკა და თორნიკე გაგნიძეების ბიძაშვილმა, დღეს, დილით შეატყობინა, მას შემდეგ, რაც გონზე მოვიდა. მისი გადმოცემით, ავარია 4-5 საათის წინ იყო მომხდარი. შემთხვევის ადგილზე პოლიციის მისვლისას, ნიკა და თორნიკე გაგნიძეები გარდაცვლილები იყვნენ.

გამოძიება სისხლის სამართლის კოდექსის 276-ე მუხლით დაიწყო, რაც მოძრაობის უსაფრთხოების წესების დარღვევას გულისხმობს.

შინაგან საქმეთა სამინისროს სტატისტიკური მონაცემებით, 2022 წლის პირველ 6 თვეში საქართველოში 2572 საგზაო-სატრანსპორტო შემთხვევა მოხდა, დაიღუპა 221 და დაშავდა 3544 ადამიანი. 2021 წელს რეგისტრირებულია 5863 სატრანსპორტო შემთხვევა, დაიღუპა 449 და დაშავდა 7705 ადამიანი. ყველაზე ხშირად ავარიების გამომწვევი სავარაუდო მიზეზებია: სატრანსპორტო საშუალების მართვა ალკოჰოლური სიმთვრალის მდგომარეობაში; სატრანსპორტო საშუალების მართვა ნარკოტიკული ან ფსიქოტროპული საშუალებების ზემოქმედების ქვეშ; მოძრაობის დადგენილი სიჩქარის გადაჭარბება.