9365 
შემთხვევის ადგილზე იმყოფება თუშეთში გამგებლის წარმომადგენელი ლადო კახოიძე. მისი თქმით, ხანძრის ლოკალიზებას ერთი მხრიდან პოლიციელები და რეინჯერები ცდილობენ, მეორე მხრიან კი მაშველები, სულ დაახლოებით 20 ადამიანი.
„ხანძრის კერამდე წყალი ვერ მიგვაქვს. სამანქანო გზა არ არის. ნიჩბებით ვცდილობთ ცეცხლის ჩაქრობას, მაგრამ ნიავი უფრო აძლიერებს. ამ დგილას, ტყეში ბევრი ხმელი ხეა და ესეც ცეცხლის გაძლიერებას უწყობს ხელს.
მინიმუმ 10 ჰეტქარი ტყე თითქმის უკვე დამწვარია და სამწუხაროდ, ხანძარი კიდევ უფრო ძლიერდება. ვერტმფრენს ვითხოვთ, ვიდრე დაღამდება, რომ იქნებ ლოკალიზება შევძლოთ.
საუბარი იყო იმაზე, სად შეიძლება ვერტმფრენმა წყალი აიღოს. გზის პირას, ხისომდე, სადაც მეწყრული ადგილია და მდინარეა დაგუბებული, იქიდან შეიძლება წყლის აღება. ამ დროისთვის არ არის იმის საშიშროება, რომ ცეცხლი დასახლებულ პუნქტებზე გავრცელდეს, თუმცა ძალიან საყურადღებო სიტუაციაა“, – აღნიშნა ლადო კახოიძემ.
სოფელ ხახაბოსთან ტყეში დაკვამლიანება დღეს, დილით შენიშნეს. ვარაუდობენ, რომ ხანძარი მეხმა გააჩინა, რომელიც შესაძლოა, გუშინ, საღამოს, ძლიერი ჭექა–ქუხილის დროს ჩამოვარდა.
სასაზღვრო პოლიციის ვერტმფრენი, რომელსაც ტყის ხანძრების დროს იყენებენ, ამ დროისთვის თელავის რაიონის სოფელ ართანას ტერიტორიაზე მუშაობს, სადაც კოხტას მთაზე ტყე იწვის.
ამ თემაზე:
როდემდე უნდა ვიყოთ დამოკიდებული მეხანძრეებისა და ტყის მცველების პირად გმირობაზე?
