საიტის მენიუ

სოციალური ქსელები

     

ყაზბეგის მოსახლეობა 500 კილოვოლტიანი ელექტროგადამცემი ხაზის მშენებლობას აპროტესტებს

15:24 - 17 იანვარი 2017 hits 6127

ყაზბეგის რაიონის სოფლების - კარკუჩას, ახალციხის და სნოს მოსახლეობა მათ სოფლებთან ახლოს მაღალი ძაბვის - 500-კილოვოლტიანი ელექტროგადამცემი ხაზის მშენებლობას აპროტესტებს და ხაზისთვის ალტერნატიული მარშრუტის მომზადების მოთხოვნით პეტიციას ამზადებს.

პეტიცია, რომელსაც ხელს 150 ადგილობრივი აწერს, საქართველოს მთავრობაში, პარლამენტსა და პრეზიდენტის ადმინისტრაციაში რამდენიმე დღეში შევა.

500-კილოვოლტიანი ელექტროგადამცემი ხაზი - ქსანი-სტეფანწმინდა “რეგიონული ელექტროგადაცემის გაუმჯობესების პროექტის“ ფარგლებში შენდება. ხაზის სიგრძე დაახლოებით 100 კმ-ია. პირველ ეტაპზე ელექტროგადამცემი ხაზი 110 კილოვოლტ ძაბვაზე იმუშავებს, სტეფანწმინდის ქვესადგურის აშენების შემდეგ კი - 500 კილოვოლტზე.

“მაღალი ძაბვის ელექტროგადამცემი ხაზი სოფლებთან ძალიან ახლოს გადის. სნოში სახლებიდან ელექტროგადამცემ ხაზამდე მანძილი სულ რაღაც 30-40 მეტრია. იქვეა მდინარე, სადაც ბავშვები საბანაოდ ჩადიან ხოლმე. მაღალი ძაბვის გადამცემი ხაზის აშენების შემდეგ ბავშვების მდინარეზე გაშვება უკვე საშიში იქნება. გარდა იმისა, რომ 500-კილოვოლტიანი ელექტროგადამცემი ხაზი საფრთხეს უქმნის მოსახლეობის ჯანმრთელობას, დასახლებასთან ასე ახლოს მისი მშენებლობა ზღუდავს სოფლის შემდგომი განვითარების პერსპეტივას: ხაზს აქვს თავისი დაცვის ზონა და იქ მშენებლობა და რაიმე სახის საქმიანობა იკრძალება. პეტიციით ადგილობრივი მოსახლეობა ითხოვს, რომ 500-კილოვოლტიანი ელექტროგადამცემი ხაზის მშენებლობისთვის ალტერნატიული მარშრუტი გაკეთდეს და ხაზი სოფლებიდან მოშორებით, ფერდობზე ან მთაზე აიტანონ,” - ამბობს www.mtisambebi.ge-სთან საუბარში ყაზბეგში მცხოვრები შოთა ბუჩუკური.

ქსანი-სტეფანწმინდის 500-კილოვოლტიანი ელექტროგადამცემი ხაზის მშენებლობის პროეტს “საქართველოს სახელმწიფო ელექტროსისტემა”, “ენერგოტრანსსი” და ფინურ-ინდური კონსორციუმი -  ELEL-EMC-ს ახორციელებს. პროექტს გერმანიის განვითარების ბანკი 25 მლნ ევროთი აფინანსებს.

500-კილოვოლტიანი ელექტროგადამცემი ხაზი რუსეთის ენერგოსისტემასთან დაკავშირების მიზნით შენდება.

პროექტის თანახმად, ხაზის მშენებლობა 2017 წლის მაისში უნდა დასრულდეს.

Mtisambebi.ge

„მთის ამბები“ დამოუკიდებელი საინფორმაციო ონლაინგამოცემაა. ვებგვერდს მართავს საინფორმაციო ცენტრების ქსელი.

საქართველოს ამბები

ამავე რუბრიკაში

ვაკანსიები მთაში

თავში